Kryeministri Edi Rama është ndalur sot në Orikumi, i cili është një nga 14 pikat ku në kuadrin e zbatimit të Planit Kombëtar të Veprimit, ka nisur të punohet për pastrimin e bregdetit.
Gjatë fjalës së tij, kryeministri Rama ka paralajmëruar se do të nisin gjobat për çdo rast të abuzimit me mbetjet.
Ndërkohë, ministrja e Mjedisit, Mirela Kumbaro u shpreh se do të nisin që tani puna për sezonin e ri turistik. “Javës që vjen do të zhvillojmë një takim me prefektët dhe kryetarët e bashkive të qyteteve bregdetare. Do të krehim të gjithë territorin”, -pohoi ministrja.
Rama tha se ndotësit më të mëdhenj të mjediseve janë hotelet, restorantet dhe fabrikat. “Do hyjmë me penalizimet, se edhe njerëzit e kërkojnë këtë gjë. Që kush ndot do penalizohet. Penalizimi kryesor duhet të vijë nga ndotësit kryesore, që janë subjektet private, hotelet, restorantet, fabrikat. Të gjithë ata që ushtrojnë aktivitete që prodhojnë më shumë mbeturina. Ata që janë aktivë gjatë sezonit të verës do ketë gjoba shumë të larta, por edhe për individët duhet të ketë gjoba të larta. Duhet të kemi një nivel tjetër zbatimi.
Është e rëndësishme të përfshihet me më shumë përgjegjshmëri Policia e Shtetit. Është e çdo punonjësi policie të jetë syri i shtetit, dhe pastaj inspektorët përkatës të bëjnë punën e tyre. Nëse do ti qëndrojmë fort këtij plani do ta vëmë në vijë dhe do ta bëjmë të pakthyeshëm. Puna është ta bëjmë të pakthyeshëm, se s’mund të jetë hajde ne pastro dhe hajde të tjerët ndot. Subjektet private duhet të informohen për një kalendarë se kur duhet ti nxjerrin mbetjet, ku duhet t’i lënë mbetjet, dhe të monitorohet që të bëhet konstante.”, tha Rama.