Anëtarja e Këshillit Kombëtar të Partisë Demokratike, Ilirjana Kuçana ka zbuluar detaje nga protesta që po organizon të mbajë ish-kryeministri Sali Berisha ditën e nesërme kundër ardhjes së Vuçiç-it në Tiranë.
Ajo deklaroi se këtë protestë po e thërret flamuri kuq e zi, duke shtuar se të gjithë shqiptarët duhet të jenë në këmbë pasi po cënohet siguria kombëtare.
“Protesta do të jetë e jashtëzakonshme. Në fokus është flamuri kuq e zi. Shqiptarët janë të lodhur, kërkojnë protesta. Lobe ruse dhe serbe janë ulur këmbëkryq në Tiranën zyrtare për të bërë pazare me fatet e shqiptarëve. Të mbështetur nga Basha dhe Rama. Duhet të themi që vizita e Vuçiç ka prapavija të forta. Janë një sërë elementesh kombëtare. Z.Berisha e ka thirrur historia për t’i dalë në krye sepse vihen në rrezik fatet e kombit shqiptar. Kur bëhet fjalë për protesta kombëtare, për kauza kaq të rëndësishme, nëse ne nuk mbrojmë kombin tonë, për interesa kaq madhore kur të thërret flamuri kuq e zi, atëherë nuk ka orar. Shqiptarët do të jenë aty në këmbë për të mbrojtur sigurinë e vendit. Duhet ta themi që sot kemi të bëjmë me situata shumë më të thella. Ka ardhur momenti të flasim hapur. Po cënohet siguria kombëtare. Ne jemi të detyruar ta mbrojmë flamurin kuq e zi”, u shpreh Ilirjana Kuçana.