Atalanta është skuadra e dytë që ka siguruar finalen e Kupës së Italisë në këtë edicion, pasi sonte në mbrëmje ka fituar 2-1 me përmbysje ndaj Fiorentinës. Sfida e parë mes tyre kishte përfunduar në shifrat 3-0. Ritmi i ndeshjes ishte i frikshëm me raste të shumta shënimi sa nga njëra portë në tjetrën. Vjollcët gjetën të parët rrugën e rrjetës që në minutën e 3-të me Luis Muriel, i cili konkretizoi një pasim fantastik të Chiesa-s.
Kundërpërgjigja e vendasve nuk do të vononte, pasi në minutën e 14-t, Gomez fitoi penallti. Nga pika e bardhë shkoi Ilicic, duke arritur që të realizonte. Në minutën e 69-të, Gomez shënoi edhe golin e dytë që do të firmoste kualifikimin, pas një gabimi fatal të portierit Lafont, i cili në përpjekje për ta pritur topin e devijoi në rrjetën e tij.
Atalanta rezistoi deri në fund edhe falë Gjimshitit, i cili zhvilloi një ndeshje monumentale, duke qenë një ndër më të mirët për ekipin e tij në fushë me ndërhyrje shumë të sakta. Madje qendërmbrojtësi i kombëtares sonë nuk ngurronte që të ndërtonte edhe aksione sulmuese. Në finale bergamaskët do të sfidojnë Lazion më 15 maj, pasi dje në mbrëmje eliminuan Milanin.