Nuk ishte një ndeshje nga ato perfektet që zakonisht Tomas Strakosha i bën në Serinë A. Gardiani i Kombëtares shqiptare gaboi në momentin kur Lacio e tij pësoi golin e parë në derbi ndaj Romës.
Bardhekaltërit arritën të barazonin rezultatin, megjithatë seria e 11 fitoreve radhazi u ndal pasi nuk shkuan më shumë se barazimi 1-1. Ndërkohë, nëpërmjet një postimi në Instagram, Strakosha ka falënderuar shokët e skuadrës të cilët u treguan të zotë për të reaguar. “Falenderoj të gjithë shokët e skuadrës të cilët reaguan dhe morën sërish ndeshjen në dorë pas gabimit tim”, ishin fjalët e portierit.
Por, duke lënë mënjanë gabimin njerëzor, 24-vjeçari tregoi aftësitë e tij në dy raste gjatë ndeshjes ku ia doli të ndalte tentativat e Xhekos për të shpëtuar Lacion nga disfata. Sakaq, në postimin e Strakoshës nuk mungonte edhe mbështetja nga futbollistët e Kombëtares, Grezda, Cikalleshi e Memolla por edhe nga ata të Lacios si Imobile dhe Milinkoviç-Saviç.