Bajram Ballabani është rikonfirmuar adminsitartor i skuadrës matjane të futbollit. Ditë më parë ai tha se Burreli nuk e arriti objektivin për t’u ngjitur në superior, duke renditur edhe anët pozitive e negative të sezonit të fundit futbollistik.
Pas konsultimeve me kryetarin e Bashkisë Mat Agron Malaj, Ballabani është dakortësuar të vijojë punën e tij si administrator edhe për sezonin e ri, 2021-2022. Në një prononcim për media tai u shpreh se:
“Unë ndjeva përgjegjësinë time për atë ç’ka nuk arritëm dot në sezonin e kaluar. E kam thënë edhe më parë që duhej të kishim ndërhyrë gjatë merkatos së dimrit në stafin teknik por edhe në përforcim të skuadrës. Kjo më bëri që unë të mendoja pozicionin tim në krye të klubit. Por pas disa takimeve me kryetarin e Bashkisë, Agron Malaj, me dëshirën e këtij të fundit por edhe mbështetjen e tifozërisë së zjarrtë, vendosa që të vazhdoj ta drejtoj klubin. Dua të falenderoj kryebashkiakun i cili ka qenë vazhdimisht një mbështetje e madhe për klubin e sportit Burreli, duke bërë gjithçka që skuadra kishte nevojë. Megjithëse është ende herët për tu finalizuar, kemi nisur punën për gjetjen e një trajneri të ri pasi do të ketë shumë ndryshime në stafin teknik por edhe tek lojtarët. Gjej rastin të falenderoj të gjithë ata futbollistë që luajtën në sezonin e kaluar ndershmërisht dhe dhanë maksimumin e tyre për fanellën e Burrelit. Për të gjithë këta, dera jonë do të jetë e hapur dhe do t’i mirëpresim me kënaqësi”-theksoi Ballabani.