Karim Benzema vendosi dje t’i jepte përfundimisht lamtumirën përfaqësueses së Francës, edhe pse shumëkush mendon se ai ka ende shumë për t’i dhënë “gjelave” në vitet në vijim. Fituesi i “Topit të Artë” mungoi në Botëror dhe pikërisht kjo mungesë duket se ka qenë pikënisja e krisjes që tashmë është bërë e parikuperueshme.
Benzema ishte në planet e Deshamp, por u dëmtua vetëm pak ditë para fillimit të Botërorit. Sipas “RMC”, lojtari ishte i bindur se do të rikuperohej për fazën me eliminim direkt, por Deshamp i kishte bërë të qartë se nuk do të mbante në ekip asnjë lojtar që nuk do të ishte i gatshëm fizikisht që për ndeshjen e parë të turneut.
Por ndërsa ai ktheu në shtëpi Benzema, nuk bëri të njëjtën gjë më Varane, duke e lënë jashtë për sfidën me Australinë për shkak dëmtimi, për ta aktivizuar vetëm në ndeshjen e dytë ndaj Danimarkës.
Një situatë që nuk i pëlqeu Benzema i cili e kuptoi se ishte i padëshiruar dhe për këtë arsye mori vendimin që të largohej përfundimisht nga përfaqësuesja e Francës, edhe për faktin e thjeshtë se ka bindjen që Deshamp do të rinovojë kontratën e tij.