Gjykata e Posaçme ka urdhëruar që ish-ministri i Shëndetësisë, Ilir Beqaj, të mos largohet nga territori i Shqipërisë dhe të paraqitet çdo të premte në policinë gjyqësore.
Lidhur me këtë vendim ka reaguar Sekretari i Përgjithshëm i Partisë Socialiste, Blendi Klosi. I ftuar në emisionin “Kjo Javë” në News24, ai u shpreh se PS nuk bëhet mburojë e askujt, teksa theksoi se beson tek kolegu Beqaj, i cili në një reagim tha se figura e tij është e pastër.
“Do doja shumë që ta pranoja atë që tha Beqaj, që i ndërgjegjshëm për situatën me drejtësinë ai jep dorëheqjen nga posti. Ai është i qetë që ky proces nuk do ta dëmtojë atë personalisht, por do ta zbardhë figurën e tij. Mendoj që ajo çfarë kemi bërë për shëndetësinë është një gjë shumë e madhe, kemi sjellë një standard tjetër në spital. Nëse procesi ka problematika kjo po hetohet dhe ne e kemi thënë që PS nuk bëhet mbrojë dhe nuk kundërshtojmë vendimet e drejtësisë së re. Unë prirem të mendoj se gjërat do të shkojnë në rrugë të drejtë dhe do të kemi një përgjigje të saktë. I besoj asaj që thotë Beqaj që në fund figura e tij do të dalë e pastër, SPAK bën detyrën. Ne nuk është se kemi anatemuar procesin”, tha Blendi Klosi.