Kryetari i PD-së, Sali Berisha ka marrë pjesë në takimin e organizuar me rastin e 34-vjetorit të themelimit të degës së Partisë Demokratike Fier. Berisha ka akuzuar qeverinë për lidhje me krimin, teksa ka thënë se “ky regjim largon çdo ditë shqiptarët nga vendi”.
Ai u shpreh se edhe PD ka pësuar tronditje të mëdha dhe janë bërë përpjekje për ta tjetërsuar si forcë politike, teksa ka shtuar se sot janë më të bashkuar, më të fortë dhe më në këmbë se kurrë më parë.
“Pas një procesi herë-herë dhe kalvari, sot jemi më të bashkuar, më të fortë, më në këmbë se kurrë. Kjo sepse ne jemi njerëz që bashkohemi në të vërtetat që besojmë”. Berisha ftoi çdo demokrat të ditëve të para 1990 që të bashkohen me PD. “Prandaj dhe këtu nga Fieri, i bëj thirrje çdo demokrati, nga viti 1990 gjer sot, të bashkohemi në kontributet tona. Sepse Shqipëria në 34 vite nuk ka pasur periudhë më kritike se kjo. Ky regjim po shkatërron Shqipërinë”, tha Berisha.
“Vetëm një kolonialist që urren kombin që ka pushtuar, mund të lerë 16 milionë euro për 780 mijë pensionistë”, theksoi më tej Berisha. Berisha tha se do të subvencionohet fermeri për çdo njësi prodhimi, për çdo kokë bagëti. “TVSH-ja për përpunuesit do jetë e njëjtë në shitje dhe blerje. Absolutisht do të mbrohen prodhimet e fermerëve shqiptarë”, tha Berisha.