Policia e Shtetit ka bërë një bilanc për muajin Shkurt. Uniformat blu thonë se janë zhvilluar 105 operacione dhe janë arrestuar 729 persona.
Po ashtu në pranga janë vënë 23 persona në kërkim ndërkombëtar të kërkuar nga shtete të huaja dhe 8 të kërkuar ndërkombëtarisht nga Shqipëria, 3 prej të cilëve me rrezikshmëri të lartë shoqërore.
Ndër të tjera, Policia e shtetit ndalet edhe tek operacionet në fushën e krimeve ekonomike. Sipas policisë janë sekuestruar pasuri me vlerë 1.5 milionë Euro.
“Njëri prej operacioneve i zhvilluar me partnerët amerikanë goditi një grup kriminal që falsifikonte dokumente, me qëllim për t’ia shitur shtetasve që synonin të kalonin ilegalisht kufirin, një operacion zbuloi një ambient të përshtatur për falsifikimin e certifikatave të mbrojtjes së gjuhëve të huaja, ndërsa një operacion tjetër zbuloi një ambient të përshtatur si call center, ku mashtroheshin shtetas të huaj, për të investuar në bursa fiktive”, njoftoi policia.