Një takim me sekretarin Amerikan të Shtetit, Antony Blinken e kishin edhe krerët e drejtësisë në Shqipëri. Ambasada e SHBA-së në Tiranë, sot teksa poston foto nga takimi i tyre dje, shkruan se ata duhet të marrin me guxim mosndëshkimin dhe të nxisin besimin e publikut.
Blinken u takua me kreun e SPAK-ut, Altin Dumanin, kryetaren e Gjykatës Kushtetuese, Olta Zaçajn, Kryetarin e Kolegjit Administrativ të Gjykatës së Lartë, Sokol Sadushin dhe Inspektorin e Lartë të Drejtësisë, Artur Metanin.
“Sekretari Blinken ritheksoi angazhimin e qëndrueshëm të Shteteve të Bashkuara për reformën në drejtësi në Shqipëri gjatë një takimi me krerët e drejtësisë sot. Megjithëse reforma nuk është as e shpejtë, as e përsosur, as e lehtë, ky është momenti që institucionet e reja të drejtësisë të marrin me guxim mosndëshkimin dhe të nxisin besimin e publikut në sundimin e ligjit. Këto sfida janë të mëdha, por Shtetet e Bashkuara qëndrojnë fort pas këtyre institucioneve dhe do të mbeten të palëkundura në mbështetjen tonë”, thuhet në reagimin e Ambasadës së SHBA-së.
