Grupi BRICS (Brazil, Rusi, Indi, Kinë, Afrika e Jugut) bëri thirrje për përshpejtimin e shpërndarjes së vaksinave antiCOVID-19, duke përsëritur se pezullimi i patentave do të ndihmonte vendet më të varfra në luftën kundër pandemisë.
Në një deklaratë të përbashkët, të lëshuar pas një takimi në internet, ministrat e Jashtëm të këtyre vendeve pohuan se një “vaksinim i përgjithësuar do të ndihmonte për të frenuar pandeminë, duke nënvizuar urgjencën e zhvillimit të shpejtë dhe shpërndarjes së vaksinave, veçanërisht në vendet në zhvillim”.
“Arritja e një marrëveshjeje për pezullimin e patentave të vaksinave do të lejonte përdorimin e pronës intelektuale, ndarjen dhe transferimin e teknologjisë duke lejuar prodhimin e vaksinave dhe shpërndarjen më të gjerë të tyre”, theksoi ministrja e Afrikës së Jugut, Naledi Pandor.
Sipas BRICS, një pezullim i patentave do të nxisë prodhimin e vaksinave me kosto të ulët, duke ndihmuar vendet e varfra që të luftojnë për të imunizuar popullatat e tyre.