Në kuadër të 60-vjetorit të themelimit të bibliotekës, njëkohësisht Ditën Ndërkombëtare të Librit, u organizua në Burrel një aktivitet i veçantë përkujtimor, i cili solli në vëmendje rrugëtimin ndër vite të këtij institucioni të rëndësishëm.
Ky aktivitet shërbeu si një moment reflektimi dhe vlerësimi për kontributin e çmuar që biblioteka ka dhënë në pasurimin kulturor, edukimin dhe formimin e brezave të tërë në komunitetin matjanë.
Në këtë ngjarje morën pjesë përfaqësues të institucioneve vendore, bibliotekarë, autorë, kontribues të ndryshëm si dhe qytetarë të shumtë, të cilët ndajnë të njëjtin vlerësim për rolin e pazëvendësueshëm të librit dhe dijes.
Gjatë aktivitetit u shpreh mirënjohje e veçantë për të gjithë donatorët dhe mbështetësit që ndër vite kanë kontribuar në rritjen dhe përmirësimin e kushteve të bibliotekës.
Një falënderim i posaçëm iu dedikua znj. Suela Koçibellinj, drejtoreshë e VIZION OJF, donatorja kryesore e rikonstruksionit të bibliotekës, për përkushtimin dhe mbështetjen e saj të vyer në transformimin dhe modernizimin e këtij institucioni kulturor.
“Biblioteka vijon të mbetet një shtyllë e fortë e dijes, edukimit dhe zhvillimit kulturor, duke shërbyer si një hapësirë frymëzuese për të gjithë ata që kërkojnë të mësojnë, të lexojnë dhe të rriten intelektualisht. Ajo është dhe do të mbetet një pikë takimi për komunitetin, ku kultura dhe dija ndërthuren për të ndërtuar një të ardhme më të ndritur”, theksoi kryetari i Bashkisë Mat, Altin Bojni.
