Agron Malaj, kandidati socialist për një mandat të dytë ka vijuar takimet elektorale me të gjithë banorët e Matit.
Në takimin e organizuar me romēt që banojnë në qytetin e Burrelit, kryebashkiaku tha se është treguar vëmendje për rritjen e kushteve për këtë kategori.
Malaj u shpreh se disa prej familjeve janë strehuar në banesa sociale dhe të tjera do të sistemohen në të ardhmen, pasi bashkia do të rehabilitojë objekte që ndodhen në territorin e bashkisë.
“Një pjesë e këtij komuniteti punojnë në ndërmarrjen e pastrimit. Ajo tashmë menaxhohet nga bashkia. Vite më parë ju nuk i merrnit pagat në kohë. Bashkia po mendon që pagat të rriten dhe të shtojmë numrin e të punësuarve”, theksoi Malaj.
Ai shtoi se është investuar kudo, edhe në lagjet ku banojnë romët. Po ashtu po punohet që fëmijët romë të ndjekin kurset profesionale dhe të punësohen në ndërmarrje dhe sipërmarrjet që ushtrojnë aktivitetin në Mat.