Matianët kanë fituar sot ndeshjen e parë të sezonit futbollistik 2020-2021 me rezultatin e thellë 5-2, duke mundur me lojë dhe gola skuadrën e Veleçikut.
Vendasit iu gëzuan golit të parë në minutën e dytë të përballjes. Vecaj i vëmendshëm nuhat kthimin e topit nga mbrojtësit e skuadrës mike, gjuan rreptë dhe “shkund” rrjetën. Në minutën e shtatë është kosovari Rexhepi që nuk toleron nga një distancë e afërt. Raboshta në fundin e pjesës së parë ngrihet mbi mbrojtësit e Veleçikut, gjuan fort me kokë dhe trefishon rezultatin.
Në pjesën e dytë janë përsëri vendasit që e thellojnë rezultatin. Sërish Rexhepi që pasi depërton në zonë gjuan tokas dhe 4-0. Ditmir Ujkaj në 68’ shënon golin e parë për llogari të skuadrës së tij. Ndërkohë është Stanaj që nuk e shkon dëm aksionin e kolegëve burrelas, shënon një gol të bukur në krahun e majtë të portierit Vjerdha. Atëherë kur u mendua se mbaruan edhe minutat shtesë gjyqtari Çela konstatoi se mbrojtësit e Burrelit e ndalën topin me dorë. Gjuan Ditmir Ujkaj dhe shënon përsëri. Ndeshja në “Liri Ballabani” mbyllet Burreli 5 e Veleçiku 2.
Tekniku Nikaj tha se skuadra në fund e lëshoi lojën dhe toleroi, ndërkohë që Rustemaj theksoi se kishte tri mungesa të rëndësishme në këtë përballje. Me këtë fitore brilante matianët janë në vendin e parë.
Skuadra mori urimet e kryebashkiakut Agron Malaj i cili shkroi në fb se: “Po ndodh ajo që prisnim dhe për të cilën punuam. Ekipi matjan u paraqit në lartësinë e duhur sot në takimin me Velecikun duke arritur rezultatin 5-2! Një ekip që i jep kënaqësi të madhe të gjithë sport dashësve. Shpresoj të vijojmë me këto rezultate dhe të siguroimë ngjitjen në kategorinë superior.”