Gjatë orëve të para të mëngjesit 4 të burgosur u arratisën nga një burg grek, dhe njëri prej tyre u arrit të kapej në 07.30 të mëngjesit të sotëm.
Sipas mediave greke bëhet fjalë për dy shqiptarë dhe dy gjeorgjanë, të cilit ishin transferuar përkohësisht pasi ishin të implikuar në episode dhune në burgun e Koridhalos.
Ata fillimisht kanë thirrur rojet për ndihmë kur një prej tyre u shtri në shesh dhe bënte të sëmurin.
Sapo rojet hynë në qeli, i kërcënuan me thikë të improvizuar, u morën armët dhe celularët dhe i mbyllën brenda.
Më pas zbritën në katin e parë, ku kërcënuan një tjetër polic që ndodhej në makinën e transferimit, morën makinën dhe u drejtuan në hyrjen e burgut ku përsëri kërcënuan me armë rojen.
Bëhet e ditur se të arratisurit morën armë dhe celularë, të cilat u përdorën në shkëmbim zjarri, pa të plagosur. Të arratisurit braktisën makinën e policisë pak metra larg burgut dhe u larguan në drejtim të panjohur. Në operacionin masiv policor përdoren dhe helikopterë që mbulojnë nga orët e para të mëngjesit gjithë Athinën.
