Pasditen e të enjtes përdoruesit e Facebook dhe Instagram patën probleme të hynin në llogaritë e tyre personale.
Vetë kompania e Facebook që ka në pronësi këto dy rrjete sociale përmes një njoftimi në Twitter thotë se “një pjesë e konsiderueshme e audiencave dhe përdoruesve online kanë hasur vështirësi në komunikim dhe se ekspertët e kompjuterëve po punojnë për të rikthyer gjithçka në normalitet”.
Më pas në një tjetër postim Facebook përjashton që këto probleme të jenë shkaktuar nga sulm kibernetik. “Po përpiqemi të rikthejmë gjithçka në normalitet, sa më parë të jetë e mundur, por mund të konfirmojmë se nuk bëhet fjalë për një sulm të llojit DDoS”, thuhet në postimin e kompanisë.
Probleme në komunikim përmes rrjeteve sociale u krijuan edhe në radhët e përdoruesve në vendin tonë. Shumë persona u ankuan me postime në Tëitter në lidhje me vonesat e postimit dhe shkëmbimit të fotove në Facebook, apo Instagram ndërsa disa portale nuk ngurruan të realizoni dhe sondazhe në lidhje me këtë çështje. Ndërkaq mediat tradicionale dhe ato online kanë hasur vështirësi në shpërndarjen e artikujve në rrjetet sociale.