Duke shpëndarë në rrjetet sociale mesazhin e mjekes Migena Qato, ministrja e Shëndetësisë Ogerta Manastirliu iu bën thirrje të gjithëve të respektojnë rregullat ndaj koronavirusit, pasi kjo sëmundje nuk kursen asnjë.
Beteja e përditshme me jetën vijon në spitalet COVID dhe tashmë po preken dhe të rinj që janë duke marrë trajtimin atje.
Mesazhi i plotë i mjekes:
“Prej më tepër se 5 muajsh po përballemi me një pandemi të përmasave, që kurrë më parë nuk ishim përballur. Ditët e fundit kanë qenë jo të lehta për ne, pasi numri i rasteve është shtuar në mënyrë të konsiderueshme dhe jo vetëm kaq. Tani dominojnë për fat të keq edhe mosha të reja, të cilat kanë qenë të paprekura nga sëmundje të tjera më parë.
Ndaj apeli shkon që të jemi shumë të kujdesshëm, të ruajmë distancën sociale, sepse tani Covid nuk ka më preference në moshë, nuk po kursen asnjë subjekt të popullatës. Ndaj jeni të kujdesshëm, mbroni veten tuaj dhe të afërmit”, shprehet mjekja.