Në një intervistë për median kosovare Koha, ish-tranjeri i Kombëtares, De Biasi është i vetëdijshëm që kuqezinjtë janë në grup shumë të vështirë, por shpreson që Shqipëria të paraqitet mirë dhe në fund të bëjë befasi të madhe.
“Mendoj se shorti është shumë i vështirë dhe grupi është shumë i fortë, megjithatë Shqipëria ka ekip cilësor. Nuk krahasohet me Spanjën, Kroacinë dhe Italinë, por mos harrojmë që në radhët e këtyre futbollistëve ka shumë lojtarë të impenjuar në ligat përkatëse dhe në kompeticionet evropiane. Mendoj se Shqipëria do të jetë më e freskët dhe shpresoj të jetë befasia e madhe e këtij grupi”, u shpreh De Biasi, i cili kualifikoi për herë të parë Kombëtaren shqiptare në një Evropian.