Faza e parë e kampionatit italian, nuk ka qenë aq pozitive për Milanin që po lundron në ujëra të turbullta, ndërkohë që u eliminua edhe nga Liga e Europës që në fazën në grupe. Sakaq, pak më ndryshe paraqitet situata në pjesën tjetër të qytetit, ku Interi mban vendin e tretë me diferencë pikësh nga vendi i katërt. Në lidhje me situatën e dy skuadrave, ka folur ish-trajneri i Kombëtares, Xhani De Biazi që ka vlerësuar mbërritjen e Marotës te Interi, ndërkohë që jep këshillë për Gatuzon.
“Milani? Në sulm kanë Higuain dhe Kutrone të cilët janë dy sulmues shumë të rëndësishëm. Kutrone është një futbollist me një dëshirë të madhe. Milani ka një ekip të mirë, por janë dëmtimet ato që po e penalizojnë shumë Gatuzon. Ata duhet të përmirësojnë më shumë repartin e mesfushës.
Interi sigurisht ka një skuadër të rëndësishme që me Marotën mund të ketë një qasje tjetër. Interi kishte nevojë për një imazh të rëndësishëm në skuadër dhe Marota mund të luajë këtë rol. Me ardhjen e tij, Interi mund të ketë një grup edhe më të mirë”, u shpreh De Biazi.