I penduari i drejtësisë Nuredin Dumani, dëshmoi sot në GJKKO, ku dha detaje për rrethanat se si u lirua një dekadë më parë pas arrestimit për pengmarrje, duke paguar 40 mijë euro tek avokati, nëpërmjet falsifikimit të raportit mjeko-ligjor. Ai u shpreh se ky dokument ishte lëshuar nga mjeku nëpërmjet ndihmës që i dha edhe dhëndri i vëllait të ish-ministrit të Drejtësisë në atë kohë, Nasip Naço. Deputeti socialist (në atë kohë, 2014, ministër Drejtësie), shkruan se distancohet nga çdo akuzë e bërë publike sot dhe gjithashtu që fton organet e drejtësisë që të kryenin hetim të thelluar.
Postimi i plotë i Nasip Naços
“Jam njohur sot nga mediat ku përmendet emri im. Dua të theksoj se:
1-Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
2-Roli i Ministrit të Drejtësisë, sipas legjislacionit në fuqi, është i kufizuar. Ministri:
- Nuk heton,
- Nuk ngre akuza,
- Nuk pushon çështje,
- Nuk jep vendime fajësie apo pafajësie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
3-Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.
- Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër”.