Futbollisti i Shënkollit, Bledi Zefi i cili dhunoi arbitrin e ndeshjes, ka marrë ndëshkim kapital. Lojtari Bledi Zefi “përjashtohet përgjithmonë nga të gjitha veprimtaritë e futbollit” për “sulm dhe dhunë ndaj zyrtarit të ndeshjes”.
Nga ai veprim e ka pësuar edhe klubi lezhjan, që “për shkak të ndërprerjes së ndeshjes me Sopotin, humbet në tavolinë me rezultatin 3-0”. Shënkolli është gjobitur me 200 mijë lekë të reja dhe do të luajë katër ndeshje në fushë asnjanëse.
Futbollisti Bledi Zefi goditi arbitrin Abdurraman Kadriu me kokë në fushë. Shkak ishte acarimi në fundin e lojës, teksa prej dhunës së kapitenit të Shënkollit, loja u ndërpre në minutën e 85-të.
Arbitri u shoqërua menjëherë në spitalin e Lezhës, ku mori ndihmën mjekësore, ndërsa lojtari 31-vjeçar përfundoi në prangat e policisë. Ai u akuzua për “goditje për shkak të detyrës”. Sipas kodit të ri penal, çështja i’u referua edhe Prokurorisë për veprime të mëtejshme.