Rikthimi i tij pritet me shumë bujë, por adhuruesit e tenisit duhet të presin ende për të parë në fushë Rafael Nadal.
37-vjeçari pritet të merrtë pejsë në Indian Wells, por duket se kjo gjë nuk ka për të ndodhur për faktin se nuk është përmbushur plotësisht faza e rikuperimit.
Ka qenë vetë Nadal i cili nëpërmjet një postimi në rrjetin social “X” njofton mbështetësit se nuk do të marrë pjesë në garë, për faktin se ende nuk është gati, teksa ka dhe një ndjesë ndaj tyre.
“E dini të gjithë sa më pëlqen të luaj këtu, ndaj edhe erdha shumë më herët për t’u stërvitur dhe për të qenë gati. Bëra gjithçka munda për të qenë gati, një stërvitje shumë të fortë dhe testet në fundjavë, por nuk jam gati për të luajtur në nivelet e këtij kompeticioni. Nuk mund të gënjej veten time dhe mijëra tifozë të mitë. Më vjen shumë keq. Do të më mungoni”-shkruan ai.
Rafael Nadal pak kohë më parë njohu dhe kundërshtarin në këtë kompeticion, kanadezin me origjinë malazeze Milos Raonic. Pas tërheqjes së spanjollit, ky i fundit do të ndeshet me indianin Sumit Nagal në raundin e 1/64 të kompeticionit amerikan të tenisit.