Pas 9 seancash të dështuara, Gjykata për Krime të Rënda ndau dosjen e Habilajve, duke vazhduar gjykimin veç për të vetmin të arrestuar në Shqipëri, Armand Koçerrin.
Procesi për Moisi Habilajn dhe 3 persona të tjerë të arrestuar në Itali, do të vazhdojë pasi të marrin dijeni për procesin me anë të letërporosive të dërguara.
Ndërkohë, me anë të një vendimmarrje të sotme, Krimet e Rënda pezulluan gjykimin për vëllain e Moisi Habilajt, Florian Habilajn dhe 3 të tjerë, pasi pas kërkimeve nuk është bërë e mundur gjetja e tyre.
Procesi për ta do të fillojë pas një viti, ose nëse arrestohen. Gjatë seancës së sotme, avokati i Armand Koçerrit, kërkoi përjashtimin e një prej gjyqtarëve të trupit gjykues, pasi ka marrë vendime për dosjen në ngarkim të Taulant Haxhirajt, i cili është dënuar si pjesë e grupit të Treblovës, që dyshohet se kultivonte kanabisin e Habilajve.
Për këtë shkak seanca u shty për në 25 shtator, në mënyrë që kërkesa e avokatit të shqyrtohet nga një gjyqtar tjetër. Të ashtuquajturit si grupi i Habilajve, akuzohen për trafikimin e tonelatave me kanabis në Itali, ndërsa hetimet për ta nisën pasi Prokuroria italiane finalizoi hetimet 3 vjecare dhe lëshoi urdhërarreste për ta.