Sali Berisha i është rikthyer edhe një herë çështjes së privatizimit të ish-klubit Partizanit, ku pranon se ka një shkelje. Berisha akuzon kryeministrin Edi Rama se është ai që në kundërshtim me ligjin e urbanistikës, në një kohë kur klubi Partizani nuk i ishte kthyer pronarëve, por ishte pronë shtetërore, vendos me firmën e tij për t’i ndërruar destinacionin nga terren sportiv, në zonë ndërtimi.
“Ai urdhëroi larot e tij që funksionojnë në SKAP dhe drejtësi si një organizatë kriminale, të privojnë kryetarin e PD nga liria e lëvizjes jashtë shtetit. Të burgosin anëtarin e Këshillit Kombëtar dhe kryetarin e Departamentit të Mjedisit, Jamarbër Malltezi, vetëm për motive politike. Pas 3 vitesh hetim, nuk është gjetur asnjë shkelje ligjore. Asnjë shkelje ligji, procedure në trajtimin e kompleksit Partizani nga Sali Berisha apo administrata e tij.
Po, ka një shkelje, duhet të jem i sinqertë me ju. Kjo shkelje mban firmën e Edi Ramës. Është Edi Rama që në kundërshtim me ligjin e urbanistikës, në një kohë kur klubi Partizani nuk i ishte kthyer pronarëve, por ishte pronë shtetërore, vendos me firmën e tij për t’i ndërruar destinacionin nga terren sportiv, në zonë ndërtimi. E bëri me valixhe eurosh këtë, nuk e di, por ai këtë e bëri në shkelje të plotë të ligjit”, tha Berisha.