Situata financiare e klubit të Barcelonës është shumë problematike dhe klubi katalanas, me ritmet që po ecën, rrezikon një kolaps të plotë financiar. Një situatë të cilën nuk mund ta ndalin menjëherë as drejtuesit e rinj të klubit, pavarësisht asaj që po përpiqen të bëjnë duke siguruar financues të rinj apo duke rinegociuar shumë kontrata me lojtarë e sponsorë.
Një auditim i brendshëm ka zbuluar se sido që të veprohet në muajt në vijim, me Barcelonën që do të vazhdojë të regjistrojë humbje të mëdha si këtë vit, ashtu edhe vitin tjetër dhe vetëm në sezonin 2022-2023, mund ta mbyllë me fitime. Dhe ky është skenari më i mirë i mundshëm.
Kanë qenë vetë drejtuesit që kanë bërë këtë auditim menjëherë sapo Laporta u konfirmua si president i ri i katalanasve, për të kuptuar se çfarë mund të bëjnë për të rregulluar gjithçka që është shkatërruar në vitet e fundit. Drejtuesit kanë bërë këto përllogaritje duke menduar se mund të mbajnë Mesin me një rinovim të rëndësishëm të kontratës së tij, si dhe të afrojnë një yll gjatë merkatos së verës për të përforcuar ekipin ekzistues.