“Debati dhe kritika janë esenca e një shoqërie demokratike dhe pluraliste që respekton të drejtat e njeriut, por ato asnjëherë nuk mund ngrihen në bazë paragjykimesh duke shqetësuar grupe shoqërore”, kështu e cilëson Institucioni i Komisionerit për Mbrojtjen nga Diskriminimi monologun e datës 6 maj të gazetari Mustafa Nano në “Arnautistan”.
Në këtë monolog Nano shprehet se e falura në rrugë duhet të ndalohet me ligj pasi këto rite fyejnë pjesën tjetëer të shoqërisë. Gjithashtu gazetari sjell në vëmendje një foto nga qyteti i Elbasanit teksa shihen gra besimtare që falen.
Nano shprehet se “Unë mendoj se këto gra janë të poshtëruara dhe këtë gjë e mendoj gjithë ditën e ditës”.
Në lidhje me këtë përmbajtje, Komisionerit për Mbrojtjen nga Diskriminimi vlerëson nevojën e vetëpërmbajtjes dhe shmangies së termave “dhunë fetare” apo “përçarje”, referuar rasteve të kryerjes së riteve fetare në sheshe publike, apo të ekspozimit publik të besimit fetar. (Shih monologun)
Deklaratë për mediat
Institucioni i Komisionerit për Mbrojtjen nga Diskriminimi u sinjalizua nga anëtarë të Komunitetit Mysliman për përmbajtje shqetësuese në Monologun e datës 6 maj, në emisionin Arnautistan, në MCN Tv.
Duke vlerësuar rëndësinë e lirisë së shprehjes, si edhe të ndërgjegjes dhe lirinë e besimit në shoqërinë tonë të garantuara në Kushtetutën e Shqipërisë, Komisioneri vlerëson nevojën e vetëpërmbajtjes dhe shmangies së termave “dhunë fetare” apo “përçarje”, referuar rasteve të kryerjes së riteve fetare në sheshe publike, apo të ekspozimit publik të besimit fetar.
Krahasimi i kryerjes së riteve fetare të çfarëdolloj besimi, me terma që nxisin perceptime negative kundrejt ushtrimit të lirisë së besimit, nuk ndihmon frymën e tolerancës dhe bashkëjetesës që Kushtetuta mëkon.Përdorimi i mjeteve të komunikimit në masë, me shtrirje të gjërë në audiencë dhe ngritja e shqetësimeve me interes publik kërkon dialog, mirëkuptim dhe qasje përfshirëse, jo krahasime negative, përgjithësime, stereotipizime apo stigmatizime.
Debati dhe kritika janë esenca e një shoqërie demokratike dhe pluraliste që respekton të drejtat e njeriut, por ato asnjëherë nuk mund ngrihen në bazë paragjykimesh duke shqetësuar grupe shoqërore.Institucioni i Komisionierit për Mbrojtjen nga Diskriminimi garanton të gjithë qytetarët se i ndjek me vëmendje të gjitha shqetësimet e sinjalizuara në adresat tona zyrtare.
