Një situatë e paprecedentë dhe aspak e hijshme ka ndodhur në kampionatin kombëtar të basketbollit për femra. Në Pallatin e Sportit “Asllan Rusi”, Partizani mundi 86-83 Tiranën, duke eliminuar vajzat bardheblu në derbin e dytë. Fundi i ndeshjes ka prodhuar skena jo të denja në parket, me të dyja kampet që janë përfshirë në një sherr masiv, teksa nuk kanë munguar grushtat mes basketbollisteve.
Në pëfundimin e ndeshjes, kur Dishnica e Tiranës dhe Bannister e Partizanit nuk i kanë mbajtur nervat. Ka qenë basketbollistja e Partizanit që ka grushtuar Dishnicën, me këtë të fundit që ia ka kthyer me të njëjtën monedhë.
Në parket më pas kanë mësyrë edhe familjarët e lojtares së Tiranës, teksa stafet dhe basketbollistet e dy kampeve janë përfshirë në të shtyra, grushta dhe rrëzime në parket. Pas shumë minutash kaos, situata është qetësuar.