Alkond Bengasi është i pari të cilit i caktohet masa e sigurisë nga të arrestuarit për grabitjen e Rinasit. Po teksa seanca zhvillohet me dyer të mbyllura, më shumë se masa lajm përmbën avokati i tij mbrojtës.
Bëhet fjalë për Adriatik Cama, ish prokurorin që u shkarkua nga vettingu dhe që është i njohur dhe si prokuror i dosjes së “21 janarit”. Tashmë pas shkarkimit në korrik të vitit të shkuar, Cama ka nisur të punojë në profesionin e avokatit.
Kujtojmë se Cama u shkarkua për shkak të problemeve me pasurinë dhe jo vetëm.
Ja çfarë tha atëherë KPK:
Trupa relatoi raportin e DSIK, që ngrinte dyshime për përfshirjen e Camës në një aferë korruptive në vitin 2005, kohë kur ai drejtonte Prokurorinë e Lushnjës.
Sipas KPK, bashkë me një prokuror tjetër, Cama ka marrë para nga familjarët e një personi të proceduar për “kontrabandë” për të pushuar hetimet ndaj tij. Në raport thuhej se Cama kishte zëvendësuar prokurorin e çështjes me një tjetër, i cili në 2 Qershor 2005 kishte pushuar çështjen.
Sipas trupës së KPK, Adriatik Cama është person i mundshëm për t’u vënë nën presionin e personave të inkriminuar, sepse ka pasur kontakte të papërshtatshme duke shkëmbyer dhurata apo favore me persona të përshirë në krimin e organizuar. Por ky pretendim u kundërshtua me forcë nga ana e prokurorit Cama.
Edhe kontrolli i pasurisë kishte vërejtur disa probleme në pasuritë e prokurorit. Pas bilanceve financiare, KPK vlerësoi se ka mungesë burimesh të ligjshme për një përqindje të tyre. Sot pas dhënies së vendimit prokurori Cama u shpreh se do të ankimojë këtë vendim.