Finalja e sotme e Conference League pritet të dhurojë mjaft emocione dhe spektakël, ndërsa do të shënojë edhe një ngjarje historike për Shqipërinë, pasi ky është eventi i parë i këtyre niveleve që zhvillohet në vendin tonë. Dy protagonistet janë Roma dhe Feynord, me italianët që rikthehen në një finale europiane pas 31 vjetësh, ndërsa hollandezët pas 20 vjetësh.
Lidhur me këtë përballje ka folur edhe trajneri i kombëtares shqiptare të futbollit, Edy Reja. Tekniku italian ka thënë për mediet atje se është i lumtur që një skuadër italiane do luajë në Shqipëri.
“Është një kënaqësi për të gjithë shqiptarët dhe Federatën. Personalisht jam shumë i lumtur që do luajë një skuadër italiane. Për më tepër në Shqipëri ka shumë tifozë të Romës dhe do të jetë sikur luajmë në shtëpi. Shqiptarët janë më shumë me italianët se me holandezët.”-tha ai.
Më tej tekniku theksoi se Tirana është një qytet i bukur për t’u vizituar, ndërsa sipas tij “Air Albania” është një stadium i mrekullueshëm.
“Tirana është një qytet i bukur, padyshim europian, i këndshëm për t’u vizituar. “Air Albania” është një stadium i mrekullueshëm. Fatkeqësisht ka pak vende në krahasim me kërkesën edhe sepse imagjinoj se sa tifozë të Romës do të kishin dashur të ishin aty”- u shpreh Edy Reja.