Çmimet e larta në treg kanë detyruar Autoritetin e Konkurrencës që të nisë një hetim të zgjeruar në lidhje me kompanitë të cilat ofrojnë policat e sigurimit për mjetet motorike në vendin tonë.
Autoriteti i Konkurrencës ka marrë në shqyrtim tregun e sigurimeve gjatë vitit 2018 ku ka konstatuar përqendrim të tregut të policave të sigurimit në duart e pak kompanive ç’ka reflektohet edhe në çmimet e policave të sigurimit që qytetarët janë të detyruar të paguajnë. Ndaj Autoriteti i Konkurrencës i ka kërkuar Autoritetit të Mbikëqyrjes Financiare rregullimin e tregjeve përkatëse të cilat janë objekt i veprimtarisë së tij, me qëllim vendosjen e një konkurrence të lirë dhe efektive nëpërmjet marrjes së masave konkrete.
Tirananews.al mëson se ndërmarrjet nën hetim nga Autoriteti i Konkurrencës kanë qenë shoqëritë e sigurimit: Sigal Uniqa Group Austria SHA, Sigma Vienna Insurance Group SHA, Atlantik SHA SHA, Intersig Vienna Insurance Group SHA, Alb-Siguracion SHA, INSIG SHA, Eurosig SHA dhe Ansig SHA. Nga verifikimet rezultoi se përpara dhjetorit 2017 shitjet e policave të detyrueshme motorike kryheshin drejtpërdrejt nga sistemi i ndërmjetësve, duke raportuar në AMF me IP e sistemit të tyre, e cila paraqitet me skemën Agjent – Sistemi i Ndërmjetësit – IP e Ndërmjetësit – AMF. Por, pas dhjetorit 2017, me urdhër të Drejtorit të Përgjithshëm Ekzekutiv të AMF, IP e ndërmjetësit u bllokua me qëllim ndalimin e skemës së mësipërme, e cila sipas AMF-së solli normalizimin e situatës me rezultat shitjen e policave nga IP-të e shoqërive. Por nga inspektimet e kryera së fundi nga Autoriteti i Mbikqyrjes Financiare ka rezultuar se ndërmjetësit kanë rifilluar punën nëpërmjet një skeme tjetër nga ajo e mëparshmja, e cila pas verifikimeve të kryera nga Autoriteti i Mbikëqyrjes Financiare rezulton me skemën Agjent – Sistemi i Ndërmjetësit – IP e Shoqërisë – AMF. Sipas kësaj skeme policat shiten fillimisht me sistemin e ndërmjetësit dhe më pas maskohen me IP-në e Shoqërive. Bazuar në konstatimet e mësipërme, nga ana e AMF-së është konkluduar se: Shitja e policave kryhet nga sistemet e ndërmjetësve (Euro Broker dhe Star Broker), të cilët kanë mundësinë për të ndërhyrë në sistem”, thuhet në vendimin Nr. 561 dat 15.10.2018
Siç është konstatuar edhe nga vetë AMF-ja gjatë inspektimeve të kryera pranë kompanive të sigurimit, agjentëve dhe ndërmjetësve, rezulton se agjentët kryejnë shitje të policave të sigurimit MTPL edhe për shoqëritë e tjera të sigurimeve për të cilat nuk janë të 6 licencuar. Në periudha të caktuara të ditës, agjenti i një kompanie sigurimi nuk mund të shiste për kompaninë për të cilën është licensuar, duke u detyruar të shesë për llogari të shoqërive të tjera, gjë e cila bie në kundërshtim me Ligjin Nr. 52/2014, “Për veprimtarinë e sigurimit dhe risigurimit”. Edhe nga pikëpamja e nxitjes së konkurrencës në treg, kjo mundësi që u jepet agjentëve nga sistemi i shitjes së ndërmjetësit, për të pasur akses në informacionin e çdo kompanie sigurimi në treg dhe për të tregtuar për çdo kompani sigurimi, rrit transparencën e tregut, por mund të çojë potencialisht në koordinimin e sjelljes së kompanive të sigurimit.
Mes të tjerash, Autoriteti i Konkurrencës i kërkon Autoritetit të Mbikqyrjes Financiare që brenda 90 ditëve, ndërmarrja “Star Broker” SHA të ushtrojë aktivitet në tregun e sigurimit të detyrueshëm motorik për përgjegjësinë ndaj palëve të treta, në mbrojtje të interesave të konsumatorit, sipas përcaktimeve të Ligjit Nr. 52/2014 “Për veprimtarinë e sigurimit dhe risigurimit”, si dhe duke zbatuar rregullat e miratuara nga AMF-ja. / tirananews.al
