Zbardhet dëshmia e 33-vjeçarit grek, i cili vrau ditën e djeshme në Mikonos shqiptarin Julian Kosova, i cili sipas mediave greke rezulton se kishte dy emra, edhe Visar Dakramaj.
Autori pretendon se ka qenë i dehur dhe se në momentin e përleshjes me 34-vjeçarin shqiptar ka humbur vetëdijen. Ai ka thënë se i vjen keq për aktin e tij të shëmtuar, duke shpresuar se do të trajtohet me butësi nga autoritetet gjyqësore.
33-vjeçari, sipas informacioneve, është vëllai i një zyrtareje në Bashkinë e Mikonosit. Ai përfaqësohet nga avokatja Elena Karygianni dhe linja e tyre e mbrojtjes pritet të bazohet në faktin e konsumimit të alkoolit bashkë me substanca të tjera.
Mediat sqarojnë se shqiptari jetonte prej vitesh në ishull. Ai njihej atje me emrin “Yannis”. 34-vjeçari kishte blerë një vilë në një prej zonave më të mira të Mikonosit.
Në lidhje me këtë ngjarje ka reaguar edhe kryebashkiaku Konstantinos Koukasis, i cili ka siguruar banorët se ky është rast i izoluar dhe se jeta në Mikonos është e sigurt.