Tirana do të luajë për raundin e dytë kualifikues në Champions League kundër Crvena Zvezda. Një kundërshtar tepër i vështirë për t’u kaluar, por jo i pamundur. Sigurisht fitorja kundër Dinamo Tbilisit ka siguruar të ardhura nga UEFA, megjithatë bardheblutë mund të marrin sërisht premio jo vetëm nga institucioni i futbollit, por nga Bashkia që është aksionere e klubit.
Ka qenë kryetari Erion Veliaj, i cili gjatë inaugurimit të një palestre në Farkë, deklaroi se mund të ketë një tjetër shpërblim për skuadrën e Tiranës, pas atij 150 milion lekësh të vjetra për fitimin e titullit kampion.
“Shpërblyem me 150 milionë lekë ekipin e Tiranës, kalon së shpejti në Këshill Bashkiak. Po fituan edhe me Crvena Zvezdën do miratojmë edhe një bonus tjetër sepse do të ishte historike. Përtej rivaliteteve që kemi, Farka, Tirana, Dinamo, Partizani, nëse një ekip shqiptar ecën lart duhet mbështetur,”- u shpreh Veliaj.