Edhe ministri i Brendshëm, Taulant Balla, hodhi poshtë zërat se janë shtuar masat për të garantuar sigurinë e kreut të SPAK-ut, Altin Dumanin.
“Dua të garantoj jo vetëm prokurorët e SPAK gjyqtarët por çdo qytetar të këtij vendi që policia e shtetit është në detyrë për të garantuar që çdo kush të jetë i sigurt. I kam kërkuar Rrumbullakut që të marrë kontakt me Dumanin për të garantuar që policia e shtetit të bëjë detyrën. Deri në momentin që flasim nuk jam informuar se ka një kërkesë apo problematike për Altin Dumanin. Lajmi është i pavërtetë”,–tha Balla.
SPAK-u reagoi më herët, kur tha se nuk ka asnjë masë shtesë dhe se mbrojtja që kryhet për drejtuesin e prokurorisë është konform procedurave dhe standardeve të miratuar.
“Drejtuesi i Prokurorisë së Posaçme mbrohet nga Garda e Republikës e cila bashkëpunon dhe koordinon veprimet me Policinë e Shtetit. Mbrojtja e Drejtuesit të Prokurorisë është konform procedurave standarde të miratuara”,-thekson SPAK.