FIFA po shqyrton mundësinë e ndryshimit të rregullave për hyrjen në Kupën e re të Botës për Klube, me synimin për të rritur numrin e ekipeve nga i njëjti vend që mund të marrin pjesë në turne. Sipas raportimeve të “The Times”, propozimi parashikon që deri në tre klube për çdo federatë kombëtare të kenë të drejtë pjesëmarrjeje, në vend të kufizimit aktual me dy skuadra.
Edicioni i parë i turneut me 32 pjesëmarrës u shoqërua me debate, pasi disa kampione të ligave kryesore evropiane mbetën jashtë. Barcelona, kampione e La Ligës, dhe Napoli, kampione e Serie A, nuk arritën të siguronin pjesëmarrjen, çka nxiti kritika mbi legjitimitetin e kompeticionit, i promovuar si një turne që mbledh klubet më të mira në botë.
Nga Anglia, Premier Liga u përfaqësua vetëm nga Çelsi dhe Mançester Siti, të dyja fituese të fundit të Ligës së Kampionëve. Ndërkohë, Liverpuli, pavarësisht se ishte kurorëzuar kampion i Premier Ligës, nuk mundi të merrte pjesë për shkak të kufizimit me dy skuadra për vend.
Propozimi për të lejuar tre ekipe nga i njëjti shtet synon të shmangë përsëritjen e situatave të ngjashme në të ardhmen.
Përveç ndryshimit të kufirit për skuadrat nga i njëjti vend, në tryezë është edhe mundësia e zgjerimit të turneut nga 32 në 48 ekipe. Kjo ide raportohet se gëzon mbështetjen e Shoqatës Evropiane të Klubeve (ECA), por has në kundërshtimin e fortë të UEFA-s.
Organi drejtues i futbollit evropian është gjithashtu kundër propozimit për zhvillimin e turneut çdo dy vjet, duke mbështetur ruajtjen e ciklit katërvjeçar aktual.
Edhe pse nuk priten vendime të menjëhershme, çështja pritet të dominojë takimin e ardhshëm të Këshillit të FIFA-s. Zëvendëspresidenti i FIFA-s, Viktor Montaliani, ka mbrojtur rezultatin e edicionit të parë, duke e cilësuar atë pozitiv.
Në këtë fazë, mbetet e paqartë se cilat nga propozimet do të marrin mbështetjen e nevojshme për t’u miratuar, ndërsa debati mes institucioneve kryesore të futbollit pritet të vijojë.