Florenc Farruku, pasaardhës i dinastisë Farruku shënoi sot në “Liri Ballabani” golin e vetëm në përballjen Burreli-Oriku.
Në prononcimin e tij për tirananews.al Farruku nuk e mohoi gëzimin për fitoren e kësaj ndeshje të rëndësishme dhe tha se golin ia dedikonte xhaxhait që mbylli sytë një ditë më parë.
“Jam shumë i lumtur që shënova. Ky ishte golim im i parë në këtë kampionat. Goli që realizova mbante peshën e tri pikëve shumë të dobishme për Burrelin. Ndeshje pati rivalitet dhe ishte mjaft e luftuar. Ne na duheshin patjetër tri pikë. Ndërkohë miqtë bënë të pamundurën për t’na barazuar. Skuadra e Burrelit luajti më e organizuar, më shpejt, më e mobilizuar”, tha Florenc Farruku.
I emocionuar pas humbjes së xhaxhait dhe mbështetjes që i dhanë tifozët, kolegët dhe stafi drejtues Farruku tha:
“Sot shënova golin tim të parë të kampionatit por humba një person mjaft të shtrenjtë, xhaxhin tim që u nda nga kjo botë. Këtë gol dua tja dedikoj atij që u ngjit lart. Gjej rastin të falenderoj gjithë lojtarët e Burrelit, drejtuesit e klubit dhe sidomos familjarët që më dhanë forcë që këtë humbje të madhe ta kthej në forcë, duke luajtur këtë ndeshje dhe duke të shënoj”.
Burreli kishte vetëm dy pikë në tri ndeshje. Me këtë fitore matjanët kanë aktualisht 5 pikë dhe u ngjitën ndjeshëm në renditje.