Napoli është skuadra e cila dukej shumë më pranë Ligës së Kampioneve në ndeshjet e javës së fundit të Serisë A, por për çudinë e të gjithëve, skuadra e drejtuar nga Gatuzo ka mbetur jashtë katërshes së parë me një fund tragjik për napolitanët pas barazimit 1-1 ndaj Veronës.
Amir Rrahmani i dha avantazhin ekipit napolitan në fillimin e pjesës së dytë dhe kjo do të thoshte se pavarësisht rezultateve të ndeshjeve të tjera, ata do të shkonin në Champions. Por në minutën e 69 të sfidës, një top i gjatë pas shpine gjeti të papërgatitur Hysajn dhe Verona barazoi me Faraonin. Sulmet e njëpasnjëshme të Napolit në fund të ndeshjes nuk shërbyen për asgjë dhe sfida u mbyll me barazimin 1-1.
Nga kjo përfituan rivalët direkt. Milani festoi me dy penallti përballë Atalantës, e cila si rrallëherë gaboi shumë para portës dhe humbi mundësinë që të mbyllte kampionatin në vendin e dytë, duke ia dorëzuar kuqezinjve. Por falënderimi më i madh për gabimin e Napolit erdhi nga Juventusi që mbylli me fitoren 4-1 sfidën me Bolonjën dhe kaloi me 1 pikë napolitanët duke siguruar vendin e katërt në renditje.
NDESHJET
Atalanta-Milan 0-2
Bolonja-Juventus 1-4
Napoli-Verona 1-1
Sasuolo-Lacio 2-0
Specia-Roma 2-2
Torino-Benevento 1-1