Deputeti i Partisë Demokratike, Ervin Salianji është dënuar nga Gjykata kundër Korrupsionit dhe Krimit të Organizuar për fyerje ndaj aktivistes Evi Kokalari.
Salianji ka marrë një dënim me gjobë e cila kap vlerën prej 50 mijë lekësh. Në fakt, gjithçka mes Salianjit dhe Kokalarit nisi gjatë një interviste televizive, ku deputeti demokrat e cilësoi aktivisten që mbështet Sali Berishën si një skizofrene. Po ashtu, Salianji vijoi më tej ku tha se, bashkëshorti i Kokalarit është i përfshirë në partinë “Agimi i Artë”, i financuar nga qarqe antishqiptare.
Kaq mjaftoi që Kokalari të ngrinte një padi ndaj Salianjit dhe tashmë mësohet se e ka fituar gjyqin ndaj tij për shpifje.