Për shkak të ecurisë së procesit të vettingut, ku janë shkarkuar mjaft gjyqtarë e prokurorë, sistemi i drejtësisë vuan mjaft mungesa duke nisur që në mangësitë e Gjykatës Kushtetuese e asaj të Lartë, por jo vetëm.
Tashmë dhe gjykatat e rretheve po funksionojnë me vështirësi, çka ka bërë që një numër i madh dosjesh të mbeten pa u shyqrtuar.
Sipas Balkanvveb, përpara një situate të tillë, Këshilli i Lartë Gjyqësor, mbi bazën e kërkesave nga gjykata të ndryshme në Tiranë e rrethe vendosi në mbledhjen e së premtes të caktojë përkohësisht 106 gjykatës, të cilët do të gjykojnë 75 dosje penale, civile dhe administrative.
Sipas Këshillit, vendimi për caktimin e përkohshëm të një numri kaq të lartë gjykatësish u bë me qëllim gjykimin e dosjeve brenda afateve që parashikon ligji, pasi në të kundërt shkeljet proceduriale mund të shfrytëzohen nga palët në proces për të bërë nul vendimin në rastet e dënimeve penale.