Greqia pretendon se Turqia po sfidon në mënyrë direkte sovranitetin e saj mbi ishujt në lindje të Detit Egje. Për këtë, Athina i është drejtuar me një letër kreut të Kombeve të Bashkuara, Antonio Guterres, në të cilën akuzon Turqinë se po ndjek një politikë armiqësore dhe “revizioniste” që po destabilizon rajonin.
Në letër theksohet se “Greqia i bën thirrje solemnisht Turqisë që të ndalojë vënien në dyshim të sovranitetit të Greqisë mbi ishujt e saj në Egje, veçanërisht nëpërmjet pohimeve të pabaza dhe historikisht të rreme (dhe) të përmbahet nga kërcënimi i Greqisë me luftë.”
Greqia dhe Turqia kanë pasur mosmarrëveshje mbi kufijtë detarë, por tensionet mes tyre u rritën në vitin 2020 pas intensifikimit të kërkimeve për naftë dhe gaz në Mesdheun lindor.
Turqia kërkon që Greqia të çmilitarizojë ishujt e saj lindorë, mbajtja e veprimit kërkohet sipas traktateve të shekullit të 20-të që ia dhanë sovranitetin e ishujve Greqisë.
Qeveria greke e quan kërkesën një keqinterpretim të qëllimshëm dhe ka akuzuar Turqinë, një anëtare e NATO-s, se po shton veprimet armiqësore në këto zona.
“Aktet tepër kërcënuese nga Turqia (përfshijnë) fluturime të përsëritura mbi territorin grek nga avionë luftarakë në kundërshtim me ligjin ndërkombëtar”, thuhej në letër.