Më 10 korrik 2019 mbushen dy vjet, kur një grup artistësh themeluan grupin folklorik me emrin simbolik per grupin Folklorik “Petralba” të Bashkisë Klos. Siç është bërë i njohur, programi i këtij grupi është me tematikë dhe interpretim të pasur, me valle, melodi e këngë nga më të bukurat e folklorit matjan e më gjërë.
Në Festivalin e parë “Fest Folk Klosi”, organizuar në shtator 2018, erdhën dhe konkuruan në Klos shoqëri kulturore-artistike dhe grupe folklorike nga mbarë trojet etnike. Ishte një ngjarje artistike dhe tregues i shpalosjes së vlerave të trashëgimisë kulturore e shpirtërore të Bashkisë Klos.
Pas festivalit, me ftesë të Shoqërisë Kulturore Artistike “Ardhmëria” Gjakovë dhe Shoqërisë Kulturore Artistike “Zëri i Llapushës” Malishevë, drejtues të Grupit Folklorik “Petralba” bënë një vizitë miqësore në Gjakovë e Malishevë. Dhe sot drejtuesit e këtyre shoqërive kulturore erdhën midis anëtarëve të Grupit Folklorik “Petralba” për një takim miqësor e për të thelluar bashkëpunimin në fushën e kulturës.
Ata shoqëroheshin nga prof. Muhamet D. Rogova; Muhamet Morina, kryetar i Ansamblit “Shqiponjat e Dukagjinit” etj. Kryetari i Grupit Folklorik “Petralba”, z. Ikli Punavija ju uroi mysafirëve mirëseardhjen dhe i përshëndeti përzemërsisht. Veç respektit të madh e gëzimit shpirtëror që përshkoi Bashkinë Klos; Zyra e Arsimit, Kulturës, Sporteve e Turizmit dhe Grupi Folklorik “Petralba”, nderuan me mirënjohje miqtë e nderuar, Ramadan Hoti, Jakup Krasniqi, Egzon Ademaj dhe Ali Mulaj, me motivacionin: “Për ndihmesë e bashkëpunim të suksesshëm në veprimtaritë e zhvilluara për promovimin e vlerave folklorike të artit popullor kombëtar, duke u bërë të dashur dhe të respektuar për Grupin tonë Folklorik e më gjërë”.
Pas kësaj ceremonie shumë domethënëse për të pranishmit u shfaq një program i pasur folklorik përshëndetës. U interpretuan valle nga nxënësit e shkollës 9-vjeçare “Tahir Hoxha” Klos, valle dyshe burrash nga Selman Beshiri, Pëllumb Elezi, Rexhep Ahmati, shoqëruar në ciganë nga Athurim Xhepi e lodër Man Xhepi, dhe një valle karakteristike nga Sajme Kurti. Këndoi e kërceu mjeshtërisht dhe Grupi i vogëlushëve “Kukuruku”, përgatitur nga Anduena Sefgjini. Kënga “Vend i dashur ku unë linda” u këndua nga rapsodi Islam Hasi dhe Veri Beça, ndërsa rapsodët e Malishevës, Shaban Bytyçi dhe Nuhi Dobruna kënduan këngë të bukura patriotike. Vajzat e Grupit Folklorik “Petralba” interpretuan bukur valle me motive matjane. Ndërsa Aziz Bytyçi, gazetar nga Prizreni, interpretoi poezinë “Plisi”. U bënë dhe përshëndetje miqësore e ftesa për thellim bashkëpunimi.
