Pep Guardiola ka refuzuar ofertën për të marrë drejtimin e kombëtares së Italisë, duke i dhënë fund shpresave të drejtuesve të rinj të federatës për ta afruar në stolin e “axurrëve”.
“Faleminderit! Jam i nderuar, por nuk mundem tani”, mësohet t’i ketë thënë Guardiola drejtorit teknik Paolo Maldini, i cili së bashku me Leonardon dhe presidentin e federatës, Malago, kishin zhvilluar bisedime me trajnerin spanjoll.
Sipas mediave italiane, refuzimi nuk lidhet me aspektin financiar. Edhe pse u raportua se Guardiola kërkonte 20 milionë euro në sezon, Maldini ka sqaruar se negociatat nuk kanë dështuar për çështje page.
Arsyeja kryesore e vendimit është dëshira e Guardiolës për të bërë një pauzë dhe për t’iu përkushtuar familjes. Që nga sezoni 2012-2013 ai ka qenë vazhdimisht në pankinë jashtë Spanjës dhe synon të marrë të paktën një vit pushim. Vetë tekniku ka deklaruar më herët se, nëse merr një detyrë, i përkushtohet asaj plotësisht.
Federata Italiane synon të nisë një cikël të ri pas mungesës në tre Kampionate Botërore radhazi. Maldini dhe Leonardo kanë bërë të ditur se trajneri i ardhshëm do të udhëheqë një projekt afatgjatë, me kohëzgjatje nga tetë deri në dhjetë vjet.
Pas refuzimit të Guardiolës, vëmendja është përqendruar te Andrea Pirlo, i cili konsiderohet kandidati kryesor për stolin e Italisë. Më herët, edhe Carlo Ancelotti refuzoi ofertën për të lënë drejtimin e Brazilit.
Ndërkohë, një tjetër figurë e rëndësishme e futbollit italian, Gianluigi Buffon, ka refuzuar rikthimin në kombëtare në një rol drejtues. Ish-portieri, i cili u largua pas dështimit të Italisë për t’u kualifikuar në Botëror, i ka kthyer përgjigje negative Maldinit dhe Leonardos edhe pas kërkesës për të marrë një rol më aktiv në projektin e ri.