Duhet të ishte një sfidë e lehtë për Kaljun, por nuk rezultoi e tillë ndaj Parnu Jk Vaprus. Rivalët e Partizanit kanë barazuar dje 2 me 2 në transfertë. Ndeshja ishte e vlefshme për javën e 18-të të kampionatit estonez.
Tashmë mund të thuhet se Kalju ka hequr dorë nga titulli kampion. Levadia ka fituar sërish ndeshjen e saj dhe distanca mes tyre tashmë është 6 pikë. Kur shorti vendosi përballë Kaljun me Partizanin, rivalët e “demave” ishin vetëm 1 pikë larg vendit të parë.
NDESHJA- Kalju dha sinjale pozitive në fillimin e takimit. Patrikejevs, pjesë e Letonisë U-21, shënoi që në minutën e 10-të. Barazimi i vendësve nuk vonoi, pasi erdhi në minutën e 17- të nga Vensalu. Mesfushori Kristjan Kask riktheu Kaljun në avantazh.
Ky ishte goli i dytë radhazi për të, pasi më parë i shënoi Levadias. Kalju nuk e ruajti avantazhin e pjesës së parë. Në minutën e 58-të u vendos baraspesha nga Pajo, për të vulosur fatin e gjithë takimit. Matias Manilan që është afrimi i vetëm për Kaljun në këtë muaj, nuk ishte në dispozicion. Pas humbjes me Levadian, ky barazim i ka larguar nga gara për titull, ndërsa ka përfunduar gjysma e sezonit.