Aleksandër Baho, i njohur me emrin Aldo, ka qenë shënjestra e atentatit të ndodhur mesnatën e 1 korrikut në periferi të Elbasanit. 30-vjeçari ka shpëtuar vetëm nga reagimi me armë i vëllait të tij të vogël, Klevin Baho, ku gjatë shkëmbimit të zjarrit mbeti i vdekur.
HETIMET
Rreth 48 orë pas atentatit mafioz në fshatin Murras, ku mbeti i vrarë 22-vjeçari Klevin Baho dhe u plagos vëllai i tij i madh, Policia ka arritur të zbulojë të tjera detaje. Pasi ka rrethuar zonën, nga edhe nisën breshëritë e armës me kallashnikov nga një mjet ende i paidentifikuar nga Policia, kjo e fundit ka gjetur poshtë urës, aty ku edhe vdiq 22-vjeçari, një pistoletë të tipit “Glock”.
Pikërisht nga kjo armë dyshohet se i është përgjigjur edhe breshëria e armëve. Shënjestër e këtij atentati mësohet se ka qenë Aldo ose Aleksandër Baho. Ky i fundit rezulton person me precedentë penalë brenda dhe jashtë Shqipërisë. I riu ka jetuar disa vite në Itali, ndërsa para se të emigronte në shtetin fqinj ka kryer një dënim për drogë në burgun e sigurisë së lartë në Peqin.
Baho, gjatë kryerjes së dënimit mësohet se ka krijuar njohje me dy vëllezërit Admir dhe Genc Tafili. Nga hetimet e para dyshohet se gjithçka lidhet me aktivitetin e 30-vjeçarit në Itali. Gjithashtu, edhe vëllai i vogël i tij që mbeti viktimë kishte vetëm pak kohë që ishte kthyer nga shteti fqinj, ku ishte dënuar me burg.
PLAGOSJA
Ky është atentati i dytë që Aleksandër Baho i mbijeton. 30-vjeçari, më 18 shkurt 2016 u plagos rëndë pas një atentati të ndodhur në Asti të Italisë.
Ai u qëllua nga tre persona sapo u vërejt prania e Bahos në një automjet, i cili po kalonte në një zonë të populluar. 30-vjeçari në atë kohë mori dëmtime serioze në shpinë, veshka dhe mushkëri, ndërsa pas rikuperimit mbeti me pasoja sa i takon ecjes, sepse arrin të lëvizë me vështirësi. E gjithë ngjarja është regjistruar nga kamerat e sigurisë, që çuan dhe në zbulimin e dy autorëve, ndërsa i treti mbetet i paidentifikuar.
Ata janë vëllezërit Valentin dhe Paulin Simoni, 32 dhe 31 vjeç. Drejtësia italiane i ka dënuar ata respektivisht me 12 dhe 11 vite heqje lirie, për plagosjen e Bahos dhe vjedhje me dhunë.
Pas atentatit ata i morën makinën një shtetasi rumun, duke e kërcënuar me armë. Ndërkohë, sipas avokatit të tyre, ka qenë Baho bashkë me gjashtë persona të tjerë që i kanë sulmuar dy vëllezërit dhe për pasojë kanë reaguar për vetëmbrojtje. Konflikti dyshohet se ka nisur për kontrollin e prostitucionit dhe shpërndarjen e drogës.