Institucionet e Vetingut nisin nesër zyrtarisht muajin e pushimit. Burime të “Panorama” pranë Kolegjit të Posaçëm të Apelimit bëjnë të ditur se: “Seanca e shpalljes së vendimit të anëtarit të Këshillit të Lartë të Prokurorisë, Gentjan Osmani, ka qenë seanca e fundit gjyqësore për këtë sezon, e Kolegjit të Posaçëm të Apelimit, për të rifilluar më 3 shtator, me Besnik Muçin, kandidat për Kushtetuese.
Me një ritëm të përshpejtuar krahasuar me muajt e kaluar, vetëm gjatë muajit korrik, Kolegji i Apelimit, ka shpallur 7 vendime, duke përmbyllur kështu atë që cilësohet si lista prioritare e subjekteve anëtarë të Gjykatës së Lartë, duke vijuar paralelisht me procesin e rivlerësimit për kandidatët për Gjykatën Kushtetuese, si dhe për anëtarët dhe kandidatët për institucionet e reja të drejtësisë”.
Po ashtu behët e ditur se: “Deri në 31 korrik, KPA ka shpallur gjithsej 32 vendime të juridiksionit të rivlerësimit, mes të cilëve vendimet e anëtarit të Gjykatës së Lartë, Edmond Islamaj, kryetarit të kësaj gjykate, Xhezair Zaganjori, kandidates për në Kushtetuese Valbona Bala, duke mos penguar ecurinë e procedurave të rregullta ligjore dhe administrative për konstituimin e këtyre gjykatave, të cilat aktualisht kanë humbur kuorumin.
Edhe sipas rekomandimit të raportit të Komisionit Europian për vitin 2019, Kolegjit të Apelimit, i është kërkuar avancim i procesit të rivlerësimit të gjyqtarëve dhe prokurorëve, por duke ruajtur cilësinë, pasi është pikërisht kjo gjykatë që pritet të konsolidojë një jurisprudencë për çështjet më kritike të procesit të rivlerësimit. Aktualisht, vendimet e KPA-së po merren si pikë referimi nga shkalla e parë e vetingut të gjyqtarëve dhe prokurorëve, Komisioni i Pavarur i Kualifikimit”.