Javën e ardhshme do të mbahet Konferenca e Parë Ndërqeveritare për anëtarësimin e Shqipërisë dhe Maqedonisë së Veriut në Bashkimin Europian. Lajmi është bërë me dije nga kreu i grupit parlamentar të PS-së, Taulant Balla.
Nga foltorja e Kuvendit, ai konfirmoi se është arritur dakordësia politike mes 27 vendeve anëtare të BE për zhvillimin e Konferencës së Parë Ndërqeveritare javën e ardhshme.
“Kërkova fjalën për të ndarë një lajm të rëndësishëm sa i përket rrugëtimin tonë drejt anëtarësimit në BE që ka të bëjë me faktin se ka një dakordësi të plotë mes 27 vendeve anëtare të BE për të mbajtur javën e ardhshme Konferencën e Parë Ndërqeveritare mes Shqipërisë dhe BE. Është një moment i rëndësishëm, kjo pas komunikimeve të disa orësh të parlamenteve anëtare. Sapo është larguar edhe ambasadori i Çekisë me të cilin pata mundësinë të zhvilloj një komunikim. Dakordësia politike tashmë është arritur dhe mbajtja e Konferencës Ndërqeveritare tashmë javën e ardhshme është fakt. Dhe ata që javën e ardhshme duan të protestojnë nuk e kanë me ne, e kanë me shqiptarët”, deklaroi Balla.