Interi i ka dhënë fund serisë së tre ndeshjeve pa fitore, për të mbajtur hapin e Juventusit e për të mos lënë më shumë bardhezinjtë të arratisen. Skuadra e Kontes sot ka mundur 2-0 Udinezen falë dygolëshit të Lukakut në pjesën e dytë, pasi kishte vuajtur deri në ato minuta përballë bardhezinjve vendas.
Me Eriksen në formacionin titullar, Interi u mundua të thumbonte në fillim, por edhe Udineze nuk u tërhoq dhe vuri disa herë në vështirësi portën e mbrojtur nga Padeli. Kthesa si për ironi të fatit erdhi sapo nga fusha e lojës doli Eriksen në pjesën e dytë të sfidës.
Lukaku gjeti golin e avantazhit pas një pasimi të Barela dhe i siguroi një avantazh të rëndësishëm skuadrës së tij që gjeti shpejt golin e 2-0 me një penallti të transformuar përsëri nga belgu. 2-0 dhe fund i serisë prej 3 ndeshjesh radhazi të mbyllura 1-1, për të mos lejuar arratinë dhe për të siguruar që të shkohet në derbi me një rezultat shumë të mirë.