Gjatë këtyre viteve të tranzicionit, të rinjtë dhe të rejat e Librazhdit e kanë parë të ardhmen e tyre në emigracion, edhe si burim kryesor i të ardhurave për të ndihmuar familjet e tyre. Sëfundmi, shumë prej tyre po rikthehen në vendlindje duke hapur ekonomi të vogla lokale.
Ekoturizmi dhe turizmi i aventurës në Bashkinë e Librazhdit nga viti në vit po merr një zhvillim të madh. Me mijëra janë turistët që vizitojnë këtë zonë me pasuri natyrore nga më të rrallat.
Lexo edhe :
Related Posts
Në një intervistë për “Vendi im” me Edlira Prendin, Kryetari i Bashkisë së Librazhdit, Mariglen Disha shprehet se veç natyrës Librazhdi tërheq vëmendjen e vizitorëve edhe për traditat, festat lokale, kulinarinë dhe mikëpritja që kanë banorët e kësaj treve.
Për të zhvilluar këtë ekonomi, Disha nënvizon se brenda vitit janë një sërë projektesh për qytetin dhe rrethinat e tij që priten të përfundojnë. “Kemi disa rrugë që janë në proces rikonstruksioni, kemi rrugën e Stërblevës që lidhet me Dibrën , kemi rrugën e Spatharit që besoj që brenda këtij muaji do të vijojë asfaltimi, kemi rrugën e Kokrevës që e kemi në fazë rikonstruksioni dhe mendoj se shumë shpejt do të bëhet asfaltimi i rrugës, kemi dhe rrugën Librazhd Qendër që lidhet me fshatin Qarrishtë ku shtrihet gjithë parku Shebenik-Jabllanicë dhe kemi në proces dhe rrugën Funarës. Në proces është dhe ngritja e një Qendre Rinore për të gjithë të rinjtë e qytetit, ku falë mbështetjes së Ministres së Shtetit dhe Rinisë ne morëm një projekt që kishim aplikuar”, shprehet Disha.
Parku Kombëtar Shebenik-Jabllanicë është një prej vendeve më të preferuara për t’u vizituar nga të apasionuarit e natyrës dhe ecjeve në pyll.
“Ne kemi dy fshatra që janë të miratuar te 100 fshatrat turistë, kemi fshatin fushë Studën dhe Dardhë. Unë sot kam caktuar dhe ditën e hapjes së sezonit turistik që pres dhe shumë turistë që vijnë nga Italia. Ata turistë do të vijnë për herë të parë në Librazhd për të parë qytetin tonë dhe për të parë zonat që ne kemi planifikuar për t’i zhvilluar. Në Fushë Studën kemi liqen shumë të bukur që turistët italianë kishin shumë dëshirë që ta vizitonin nga afër. kemi dy monumente kulture, Ura e Kamarës ku vijnë shumë turistë. Kemi aplikuar dhe për rikonstruksionin e Muzeut të Qytetit, që është monument kulture i kategorisë së parë dhe shpresoj që të përfundojë brenda vitit 2024”, deklaron Disha.
Objektivat e kryebashkiakut për tre vitet e ardhshme janë rikonstruksioni i rrugëve kryesore të fshatrave dhe përmirësimi i kushteve në çerdhe, kopshte dhe shkolla.
Për më tepër ndiqni intervistën e plotë: