Grupi famëkeq “Albkings” në Telegram është kthyer sërish, edhe pse është mbyllur disa herë për aktivitetin e tij.
Pjesë e këtij grupi deri tani janë rreth 57 mijë persona, shumica djem, të cilët shkëmbejnë me njëri-tjetrin video dhe foto intime të vajzave me të cilat kanë pasur raporte.
Përveçse publikohen pamje për të rritur të vajzave, pa lejen e tyre, në grupin virtual publikohen edhe pamje gjatë kryerjes së akteve seksuale me to, ku shihet se në shumicën e rasteve xhirohen pa dijeninë e tyre.
Fenomeni rëndohet më shumë me publikimin e të dhënave personave të vajzave, përfshirë numrin e tyre të telefonit, emrin dhe mbiemrin. Ato më pas kontaktohen dhe marrin oferta për kryerjen e marrëdhënieve të mëtejshme seksuale kundrejt pagesës.
Administratorët e grupit po ashtu kërkojnë para në këmbim të heqjes së një videoje apo fotoje denigruese.
Policia e Kosovës dhe Shqipërisë ka marrë denoncime të ndryshme për aktivitetin e grupit në Telegram, më i fundit në Lipjan, ku babai i një të miture raportoi se asaj i ishte publikuar fotoja dhe një video intime.
Tema u diskutua të hënën në një emision televiziv, ku u dëgjua edhe dëshmia e një prindi tjetër, vajza e të cilit po vuan pasojat e zbulimit të jetës së saj private pa dëshirën e saj.
Pas publikimit të fotove intime të minorenes, babai i vajzës tha se brenda pak minutave në telefonin e saj vinin qindra mesazhe shqetësuese.
“Kur i merrja numrat mbrapsht nuk përgjigjej askush, vetëm shkruanin mesazhe se kam fotot tuaja nudo etj. Më kërconin me ‘do t’i publikojmë aty, do t’i publikojmë këtu’. Por çfarë të publikojnë kjo racë e keqe, pedofila. Jam i bindur 100 për qind që nuk ka asgjë, vetëm thjesht shantazhe. U kam kthyer mesazhet duke u thënë se do lajmëroj policinë. Dhe mesazhet me këta numra, fotografitë e tyre, i kam fotografuar për t’i denoncuar në polici,” tha prindi i vajzës që ka rënë viktimë e grupit.