Izraeli iu ka bërë thirrje shtetasve të tij që të anulojnë fluturimet drejt Stambollit, nëse kanë bërë planifikime të tilla, si dhe të kthehen në atdhe nëse ndodhen atje.
Një mesazh i njëjtë u lëshua edhe më 30 maj, kur autoritetet në Izrael paralajmëruan shtetasit që të mos udhëtojnë drejt Turqisë për shkak të kërcënimeve iraniane për të vrarë ose rrëmbyer izraelitë.
“Ne po u bëjmë thirrje izraelitëve që të mos fluturojnë për në Stamboll – dhe nëse nuk keni një arsye jetike, mos fluturoni për në Turqi. Nëse jeni tashmë në Stamboll, kthehuni në Izrael sa më shpejt të jetë e mundur…”Këto kërcënime terroriste janë të drejtuara te pushuesit izraelit. Ata po zgjedhin, në mënyrë të rastësishme, por të qëllimshme, shtetas izraelitë me synimin për t’i rrëmbyer ose vrarë ata”, deklaroi ministri i Jashtëm i Izraelit, Yair Lapid.
Teherani është zotuar të hakmerret kundër Izraelit, të cilin e fajëson për vrasjen më 22 maj të Hassan Sayad Khodai, kolonel i Gardës Revolucionare Islamike në Iran, i cili u qëllua për vdekje në timonin e makinës së tij nga dy persona me motoçikletë.