Mungesa e Serxhio Ramos në listën e lojtarëve të grumbulluar nga trajneri Luis Enrike për Europian, ishte një nga surprizat e pakëndshme për Spanjën. Mbrojtësi që ka vuajtur dëmtimet në këtë sezon, nuk ia ka dalë të rikuperohet dhe kështu mbetet jashtë kompeticionit madhor. Së fundmi, Ramos ka reaguar duke theksuar se luftoi deri në fund për të qenë gati, por ishte e pamundur.
“Pas disa muajve të komplikuar dhe një sezoni atipik nga ato të fundit për mua, tani kësaj i bashkohet edhe mungesa në Europian. Punova dhe luftova në çdo ditë me trup dhe shpirt për të qenë në 100% me Realin dhe kombëtaren, por gjërat ndonjëherë nuk shkojnë ashtu siç duam ne. Më dhemb kur e di që nuk e ndihmova më shumë skuadrën dhe gjithashtu të mos përfaqësoj vendin tim.
Por, në këtë rast është më mirë të pushoj, të rikuperohem plotësisht dhe sezonin tjetër të kthehem ai i zakonshmi. Më dhemb, por duhet të jem i ndershëm dhe i sinqertë. I uroj të gjithë shokëve të mi shumë fat, shpresoj të kemi një Europian të madh. Do të bëj tifozllik si gjithë të tjerët. Një përshëndetje për të gjithë dhe rroftë Spanja”, mbyll reagimin Ramos.